នី កែវប៉ុញ្ញា

អំណោយសម្រាប់ទិវានៃសេចក្ដីស្រឡាញ់

នី កែវប៉ុញ្ញា — Tue, 14 Feb 2012 08:37:07 +0000

អង្គុយលេងៗ ក៏នឹកឃើញរូបបេះដូងដែលយកលៀសហាលមករៀប រួចក៏ទាញម៉តូជិះទៅទិញសៀសហាលនេះចំនួនពីរកំប៉ុងក្នុងតម្លៃ ៣០០០ រៀលគត់ រួចយកមករៀប ហើយទាញម៉ាស៊ីនថតមកថតទុកជាអំណោយសម្រាប់ទិវានៃសេចក្ដីស្រឡាញ់។ បន្ទាប់ពីថតរួចហើយ លៀសហាលទាំងអស់នេះក៏បានក្លាយជាម្ងូបសម្រាប់បាយកកពេលរសៀលយ៉ាងឆ្ងាញ់តែម្ដង ! សរសេរដល់ត្រង់នេះ ចេញទឹកមាត់ច្រោកៗៗៗ !!!

លៀសហាល ជាអំណោយពិសេសសម្រាប់សម្រាប់មនុស្សពិសេស ក្នុងទិវានៃសេចក្ដីស្រឡាញ់។ វាជាផលិតផលរបស់ខ្មែរ មានតម្លៃថោក មានរសជាតិឆ្ងាញ់ ប្រៃហើយហិរដែលនារីភាគច្រើនចូលចិត្ត ហើយវាមានរាងរៅស្រដៀងនឹងរូបបេះដូងទៀតផង។ ដូច្នេះគួរតែសាកល្បងប្តូរមករកអំណោយបែបនេះ ក៏ដូចជារស់ជាតិពីផ្អែមមកប្រៃហិរម្ដងមើល !

Dried Freshwater Clam is the best gift for your special one(s) on the Valentine’s Day. It is the Khmer product, cheap, but tasty in which most women and girls very much like it, and additionally its shape is very similar to heart image.

រូបភាព ៖ កុមារីជនបទ

នី កែវប៉ុញ្ញា — Fri, 27 Jan 2012 04:56:58 +0000

កុមារីម្នាក់នៅតំបន់ជនបទដាច់ស្រយាលមួយក្នុងខេត្តតាកែវ។ ខ្ញុំបានថតក្មេងស្រីនេះ នៅពេលដែលនាង និងបងប្អូនប្រុសស្រីតូចៗបីនាក់ផ្សេងទៀតកំពុងដើរជីកក្ដាមនៅតាមវាលស្រែដែលទើបនឹងច្រូតកាត់ហើយ។ ខ្ញុំគិតថា នាងសំឡឹងខ្ញុំដោយភាពងើងឆ្ងល់ ហើយប្រហែលជាមិនដឹងថាខ្ញុំបានកំពុងតែថតនាងផងក៏មិនដឹង។

កម្មវិធី “ឡូយ9″ របស់ទូរទស្សន៍ CTN

នី កែវប៉ុញ្ញា — Mon, 16 Jan 2012 10:31:57 +0000

លោកអ្នកប្រហែលជាបានទស្សនាដែរហើយនូវកម្មវិធី “ឡូយ9″ របស់ស្ថានីយ៍ទូរទស្សន៍ CTN កាលពីរាត្រីថ្ងៃអាទិត្យកន្លងមកនេះ។ ចំពោះដំណើរកម្មវិធីទាំងមូល ខ្ញុំមិនសូវជាចាប់អារម្មណ៍ទេ ប៉ុន្តែខ្ញុំចាប់អារម្មណ៍នឹងចំណងជើងកម្មវិធីដែលគេឲ្យឈ្មោះថា “ឡូយ9″ នេះឯង។

យើងធ្លាប់តែយកពាក្យ “ឡូយ” នេះមកនិយាយលេង ឬប្រើសម្រាប់ភាសានិយាយ។ ដឹងអី CTN យកពាក្យនេះមកដាក់ចំណងជើងកម្មវិធី ដោយបន្ថែមពាក្យ ៩ នៅខាងចុងទៀត។

ខ្ញុំសូមលើកយកឈុតមួយក្នុងកម្មវិធីនេះដែលនិយាយទាក់ទងដល់ពាក្យ “ឡូយ” នេះ មកបង្ហាញបន្តិចទៅចុះ។ ពិធីការនីម្នាក់គេដើរធ្វើសម្ភាសន៍ជាមួយយុវវ័យមួយចំនួនថាតើគេយល់ដូចម្ដេចចំពោះពាក្យថា “ឡូយ” នេះ។ ដំបូង យុវតីពីរនាក់គេយល់ថា ការដែលគេមានសម្លៀកបំពាក់ស្អាតបាត មានសម្ភារប្រើប្រាស់ទំនើប គឺគេហៅខ្លួនគេថាឡូយ។ ចំណែកយុវជនម្នាក់ទៀតជិះម៉ូតូធំពណ៌លឿង គឺគេឡូយ ដោយសារមានម៉ូតូថ្លៃជិះ។ ហើយយុវតីម្នាក់ទៀត ការដែលខ្លួនគេរៀនពូកែ បានន័យថាខ្លួនគេឡូយ។ រីឯបុរសម្នាក់ដែលជាអ្នកធ្វើការ អង្គុយលើកៅអី មាន Laptop នៅលើតុពីខាងមុខ គាត់យល់ថា ការដែលគាត់ខិតខំធ្វើការបានសម្រេច ទាន់ពេលវេលា មានប្រាក់កាសគ្រប់គ្រាន់ មានការងារល្អ គ្រួសារមានសុភមង្គល គឺគាត់ឡូយ។

និយាយពីខ្ញុំវិញម្ដង កាលពីមុន ខ្ញុំតែងតែយល់ថាពាក្យ “ឡូយ” គឺសំដៅទៅន័យថា អស្ចារ្យ សង្ហារ ស្អាត ប្លែក។ល។ ដូចដែលគេនិយាយពេលសម្ភាសន៍ខាងលើអញ្ចឹង។ ប៉ុន្តែអ្វីដែលខ្ញុំដឹងគឺថា ពាក្យ “ឡូយ” នេះ ជាពាក្យវៀតណាម ឬហៅថាពាក្យកម្ចីពីវៀតណាម ហើយខ្ញុំក៏មិនប្រាកដថាវាមាននៅក្នុងវចនានុក្រមខ្មែរដែរឬអត់។ មិនអស់ចិត្ត ក៏ចាប់ទាញវចនានុក្រមសម្ដេចសង្ឃ ជួន ណាត មកបើកមើល។

ព្រះអ្ហាយ៍ ន័យខុសពីអ្វីដែលខ្ញុំបានគិត ក៏ដូចជាអ្នកផ្សេងបានគិត ១៨០ ដឺក្រេ។ តោះទៅមើលវចនានុក្រមទាំងអស់គ្នា។

ឡូយ គុ. ឬ កិ. វិ. ពាក្យសាមញ្ញទំនើបថ្មីប្រើកាត់ខ្លីមកពីពាក្យ ឡូយថូយ សំដៅសេចក្ដីថា “ផ្ដេស, ផ្ដេសផ្ដាស” ៖ មនុស្សឡូយ, គំនិតឡូយ; កុំឡូយពេក ! (ម. ព. ឡូយថូយ ផង)។

អញ្ចឹងយើងទៅមើលពាក្យ “ឡូយថូយ” បន្តទៀត។

ឡូយថូយ គុ. ឬ កិ. វិ. (យ.) ដែលមិនយកចិត្តទុកដាក់, សោះអង្គើយ; ខ្ជីខ្ជា; ដែលតាមតែបាន, តាមតែរួចពីដៃ; ដែលឥតប្រយោជន៍; ផ្ដេសផ្ដាស : គំនិតឡូយថូយ; ធ្វើការឡូយថូយ (ពាក្យសាមញ្ញទំនើបថ្មី)។

ដល់អញ្ចឹង តើកម្មវិធី “ឡូយ9″ បានន័យថាម៉េច ??? តើលោកអ្នកយល់យ៉ាងណា ???

បញ្ញាក់ ៖ គុ. = គុណនាម, កិ. វិ. = កិរិយាស័ព្ទវិសេស, ម. ព. = មើលពាក្យ, យ. = យួន។

តន្រ្តីការនីបុរាណខ្មែរ

នី កែវប៉ុញ្ញា — Fri, 13 Jan 2012 07:57:24 +0000

តន្រ្តីការនីបុរាណខ្មែរ កំពុងប្រគុំបទភ្លេងកំដរភ្ញៀវ នៅក្នុងសណ្ឋាគារដ៏ទំនើបមួយកន្លែង នាទីក្រុងសៀមរាប។

ថ្ងៃរៀបអស្ដង្គតនៅឯជាយក្រុងភ្នំពេញ

នី កែវប៉ុញ្ញា — Tue, 03 Jan 2012 08:26:20 +0000

ឥឡូវនេះ ការដួលសន្លប់ លែងរើសមុខ

នី កែវប៉ុញ្ញា — Tue, 29 Nov 2011 07:32:15 +0000

ពីមុនមក យើងធ្លាប់តែឮជាញឹកញាប់ថាមានតែកម្មកររោងចក្រកាត់ដេរទេដែលបានដួលសន្លប់ ប៉ុន្តែមួយរយៈពេលថ្មីៗនេះមានករណីដួលសន្លប់ចំនួនពីរលើកបានកើតឡើងចំពោះសិស្សសាលានៅខេត្តពោធិ៍សាត់ ហើយនៅថ្ងៃនេះមានករណីក្រុមយុវជនកាយញារិទ្ធរាប់សិបនាក់បានធីងធោង និងដួលសន្លប់នៅពហុកីឡាដ្ឋានជាតិអូឡាំពិក ក្នុងកម្មវិធីបំពាក់កន្សែងដល់ឥស្សរជនកាយញរិទ្ធចំនួន ១០០នាក់ ក្នុងចំណោមក្រុមយុវជនកាយញារិទ្ធចំនួនប្រមាណ ១ម៉ឺននាក់ ក្រោមអធិបតីភាពដ៏ខ្ពង់ខ្ពស់របស់ឯ.ឧ. ឧបនាយករដ្ឋមន្ត្រី សុខ អាន។

ជាទូទៅ មូលហេតុនៃការដួលសន្លប់ត្រូវបានគេបន្ទោសទៅលើបរិស្ថានការងារ បរិស្ថានជុំវិញ និងការបរិភោគមិនគ្រប់គ្រាន់ (ការបរិភោគសន្សំសំចៃ ដោយសារប្រាក់ខែតិច)។

ខ្ញុំគិតថាទាំងនេះជាកត្តាមួយហើយ ប៉ុន្តែសួរថាតើគេមានគិតដល់កត្តាមួយផ្សេងទៀតដែរឬទេ ? ភាគច្រើននៃម្ហូបអាហារ បន្លែ ផ្លែឈើ ដែលយើងបរិភោគសព្វថ្ងៃ សុទ្ធតែសម្បូរទៅដោយសារធាតុគីមីធ្វើឲ្យប៉ះពាល់ដល់សុខភាព និងអាយុជីវិត ហើយធ្វើឲ្យសុខភាពយើងចុះខ្សោយបន្តិចម្ដងៗដោយមិនដឹងខ្លួន រហូតដល់ដំណាក់កាលមួយដែលជម្ងឺជាច្រើនវាយលុកចូលក្នុងខ្លួន ដូចជា ជម្ងឺរាគរូស អាសន្នរោគ ថ្លើម ក្រពះ ទឹកនោមផ្អែម ។ល។ តើយើងចង់ឲ្យប្រជាជនយើងមានសុខភាពល្អ មានអាយុវែង កាត់បន្ថយការកើតជម្ងឺផ្សេងៗយ៉ាងម៉េចនឹងកើត ប្រសិនបើម្ហូបអាហារដែលយើងបរិភោគសព្វថ្ងៃសុទ្ធតែប្រើប្រាស់ និងមានផ្ទុកដោយសារធាតុគីមីដូច្នេះ ? អ្នកឯកទេស និងគ្រូពេទ្យតែងតែទូន្មានថា ការបរិភោគបន្លែច្រើន ជួយសម្រួលការរំលាយអាហារ កាត់បន្ថយជាតិខ្លាញ់ មានស្បែកស្អាត មានសុខភាពល្អ។ល។ ចុះបើបន្លែយើងមានសារធាតុពុលអញ្ចឹង តើបានសុខភាពល្អពីណាមក ? វាមិនប្រៀបដូចជាយើងបរិភោគថ្នាំពុលបន្តិចម្ដងៗជារៀងរាល់ថ្ងៃទេឬ ? ក្រសួងសុខាភិបាលក៏ធ្លាប់បានប្រកាសផងដែរថា ក្នុងមួយឆ្នាំៗប្រជាជនខ្មែរត្រូវចំណាយប្រាក់អស់រាប់រយលានដុល្លាទៅលើការព្យាបាលជម្ងឺ។

ខ្ញុំធ្លាប់ដកពិសោធន៍ខ្លួនឯង នៅពេលដែលខ្ញុំបរិភោគបន្លែឆៅដែលទិញពីផ្សារ ខ្ញុំតែងតែឈឺពោះ ឬរាគ ទោះបីជាខ្ញុំលាងសម្អាតយ៉ាងណាក៏ដោយ។ ក្រោយមកខ្ញុំបានទៅទិញបន្លែដែលដាក់លក់នៅហាងអង្គការសេដាក់ ជាប្រភេទបន្លែដែលគ្មានសារធាតុគីមីបំផ្លាញសុខភាព។ ឃើញថាក្រពះខ្ញុំអាចទទួលយកបាន ដោយគ្មានបញ្ហាអ្វីទាំងអស់។ អញ្ចឹង រាល់ពេលដែលខ្ញុំចង់បរិភោគបន្លែឆៅ ខ្ញុំតែងតែទៅទិញបន្លែនៅតាមហាងអង្គការសេដាក់។ ខ្ញុំនិយាយនេះមិនមែនចង់ផ្សព្វផ្សាយឲ្យអង្គការសេដាក់នោះទេ ប៉ុន្តែវាជាការជូនព័ត៌មានសម្រាប់អ្នកទាំងឡាយណាដែលមានបំណងចង់បានបន្លែតាមបែបធម្មជាតិ។

ខ្ញុំសំណូមពរឲ្យក្រសួង និងអង្គការពាក់ព័ន្ធនានា មេត្តាជួយបន្ត និងបង្កើនការអប់រំ ក៏ដូចជាការផ្សព្វផ្សាយដល់ប្រជាពលរដ្ឋដែលជាអ្នកបង្កបង្កើនផលកសិកម្ម ឲ្យគាត់បានយល់ និងផ្លាស់ប្ដូរមករកការដាំដុះដំណាំបែបធម្មជាតិដែលគ្មានសារធាតុគីមីបំផ្លាញសុខភាព ហើយទន្ទឹមនឹងនេះក៏គួរទប់ស្កាត់ការនាំចូលផលិតផលដែលមានសារធាតុគីមី ដូចជាបន្លែ ផ្លែឈឺ សាច់ និងគ្រឿងឧបភោគបរិភោគជាច្រើនទៀត៕

រាជធានីភ្នំពេញ ៖ ស្ទើរភ្លើង និងមិនគ្រប់ទឹក

នី កែវប៉ុញ្ញា — Tue, 29 Nov 2011 06:26:13 +0000

ព្រលឹមឡើង បើកភ្នែកសឹងតែមិនទាន់ អគ្គិសនីដាច់ម្ដង ពេលថ្ងៃត្រង់ ដាំបាយមិនទាន់ឆ្អិនផង អគ្គិសនីដាច់ម្ដងទៀត ហើយពេលល្ងាចមិនទាន់ងងឹតស្រួលបួលផង អគ្គិសនីក៏ដាច់ម្ដងទៀត។ សរុបទៅ ក្នុងមួយថ្ងៃៗ អគ្គិសនីបើមិនដាច់ពីរដង ក៏បីដងដែរ ហើយដាច់ម្ដងៗមិនតិចជាងពីរម៉ោងឡើយ។ តាំងពីវាដាច់ញឹកញាប់អញ្ចឹងមក ខ្ញុំសឹងតែមិនបានទស្សនាព័ត៌មានតាមកញ្ចក់ទូរទស្សន៍ផងទេ។

ថាភ្លើងចុះវាអញ្ចឹងទៅហើយ ស្រាប់តែកាលពីពីរបីថ្ងៃមុននេះ ស្រាប់តែខាងរដ្ឋករស្វ័យតរាជធានីភ្នំពេញត្រូវបានដកស្រង់សម្ដីតាមសារព័ត៌មានថា នៅរដូវក្ដៅខាងមុខនេះ រាជធានីភ្នំពេញនឹងប្រឈមកង្វះទឹកស្អាតពេលម៉ោងដែលមានតម្រូវការច្រើន (មានន័យថាពេលព្រឹក និងពេលល្ងាច)។ សារព័ត៌មានបន្ថែមថា ម៉ាស៊ីនរបស់រដ្ឋករស្វ័យតផលិតទឹកស្អាតបានត្រឹមតែ៣០ម៉ឺនម៉ែតគូបក្នុងមួយថ្ងៃ ចំណែកតម្រូវការប្រចាំថ្ងៃនេះមានដល់ទៅ ៣១ម៉ឺនម៉ែត្រគូបឯណោះ ហើយរហូតដល់រដូវក្ដៅខាងមុខនេះ តម្រូវការនឹងឈានដល់ ៣៣ម៉ឺនម៉ែត្រគូបក្នុងមួយថ្ងៃ។

ដល់អញ្ចឹងបានខ្ញុំនឹកឃើញថា ជាច្រើនខែមកហើយ ទឹកនៅផ្ទះខ្ញុំចេញមិនខ្លាំងដូចពីមុនទាល់តែសោះ ជាពិសេសពេលព្រឹក និងពេលល្ងាច។ រហូតដល់ពាក់កណ្ដាលយប់ ទើបទឹកបាញ់ខ្លាំងពេញទំហឹង។ កាលពីប្រមាណពីរខែមុននេះ ខ្ញុំធ្លាប់ទិញទឹកសុទ្ធងូតពេលព្រឹកអស់មួយធុងធំទៅហើយ ដោយសារទឹកអត់ចេញសោះនៅពេលព្រឹក។

ឥឡូវកំពុងរកទិញធុងទឹកធំមួយដើម្បីស្តុកទឹកទុកប្រើប្រាស់ ក្រែងលោពេលខាងមុខទឹកមិនចេញនៅពេលព្រឹក មិនដឹងជាបានអីងូត ដើម្បីទៅធ្វើការងារទេ។

មិនដឹងថាខាងរដ្ឋករស្វ័យតមានផែនការបង្កើនសមត្ថភាពផលិតទឹកស្អាតឬទេ។ ចំណែកខាងអគ្គិសនីវិញ នៅពេលវារីអគ្គិសនីកំចាយត្រូវបានដាក់ឲ្យដំណើរការនៅឆ្នាំខាងមុខ យើងសង្ឃឹមថាទីក្រុងភ្នំពេញនឹងមានភ្លើងប្រើប្រាស់គ្រប់គ្រាន់ទៅចុះ៕

សុរិយារៀបអស្ដង្គត នៅស្ពានប្រាំពីរមករា តាមផ្លូវជាតិលេខបី

នី កែវប៉ុញ្ញា — Mon, 28 Nov 2011 01:12:24 +0000

បម្រាមសម្រាប់មនុស្ស ឬសម្រាប់សត្វពាហនៈ ?

នី កែវប៉ុញ្ញា — Mon, 17 Oct 2011 01:25:46 +0000

ស្រុកបាធាយ ខេត្តកំពង់ចាម ៖ ស្លាកបម្រាមមួយផ្ទាំងដែលគេសរសេរបិទនៅលើរបងក្បែរច្រកចូលក្នុងដីឡូតិ៍ដ៏ធំមួយ។ Photo: Ny KeoPonha

បើគ្រាន់តែក្រឡេកមើល ឬអានធម្មតា នោះលោកអ្នកនឹងមិនចាប់អារម្មណ៍អំពីអត្ថន័យរបស់វាទេ។

ប៉ុន្តែ បើលោកអ្នកអាន និងគិតតែបន្តិច វាអាចមានន័យមួយបែបផ្សេងពីការយល់របស់មនុស្សទូទៅ។ តើស្លាកនេះគេសរសេរដើម្បីឲ្យមនុស្សមើល ឬឲ្យសត្វមើល ? បើពិនិត្យទៅលើបែបនៃការសរសេរ វាហាក់ដូចជាគេហាមសត្វពាហនៈដោយផ្ទាល់តែម្ដង គេមិនបានហាមម្ចាស់របស់សត្វទេ។ អញ្ចឹងមានន័យថា សត្វនៅតំបន់នោះចេះអានអក្សរខ្មែរ ?

តើអាចថាមកពីខ្ញុំគិតជ្រៅពេកទេដឹង ? ខ្ញុំគ្រាន់តែថតលេង ហើយអផ្សុកពេកក៏ចេះតែ Post លេងដែរទៅ។ ខ្ញុំគ្មានបំណងអ្វីទេ។

ជ្រុងមួយនៃអគារកាស៊ីណូចាស់លើភ្នំបូកគោ

នី កែវប៉ុញ្ញា — Mon, 10 Oct 2011 01:34:01 +0000

ខាងក្រោមនេះ គឺជារូបភាពមួយចំនួនដែលខ្ញុំទើបនឹងបានថតកាលពីពេលថ្មីៗនៅក្នុងអគារកាស៊ីណូចាស់នៅលើខ្នងភ្នំបូកគោ។ មិនដឹងថាវាមានភាពទាក់ទាញឬអត់ទេ ខ្ញុំគ្រាន់តែសាកល្បងថតសម្រាប់ការកំសាន្តប៉ុណ្ណោះ។

នី កែវប៉ុញ្ញា

អំណោយ​សម្រាប់​ទិវា​នៃ​សេចក្ដី​ស្រឡាញ់

រូបភាព ៖ កុមារីជនបទ

កម្មវិធី “ឡូយ9″ របស់​ទូរទស្សន៍ CTN

តន្រ្តីការនីបុរាណខ្មែរ

ថ្ងៃ​រៀប​អស្ដង្គត​នៅ​ឯ​ជាយ​ក្រុង​ភ្នំពេញ

ឥឡូវ​នេះ ការ​ដួល​សន្លប់​ លែង​រើស​មុខ

រាជធានីភ្នំពេញ ៖ ស្ទើរ​ភ្លើង និង​មិន​គ្រប់​ទឹក

សុរិយា​រៀប​អស្ដង្គត ​នៅ​ស្ពាន​ប្រាំពីរ​មករា តាម​ផ្លូវ​ជាតិ​លេខ​បី

បម្រាម​សម្រាប់​មនុស្ស ឬ​សម្រាប់​សត្វ​ពាហនៈ ?

ជ្រុង​មួយ​នៃ​អគារ​កាស៊ីណូ​ចាស់​លើ​ភ្នំ​បូកគោ