Monthly Archives: ខែកុម្ភៈ 2013

ព្រះរាជពិធីកាន់ទុក្ខចុងក្រោយ មានរយៈពេល ៧ ថ្ងៃ គិតចាប់ពីថ្ងៃទី ០១ ដល់ ០៧ ខែកុម្ភៈ ឆ្នាំ ២០១៣។

ព្រះរាជពិធីដង្ហែរព្រះបរមសពព្រះមហាវីរក្សត្រ សម្ដេចព្រះ នរោត្ដម សីហនុ បានប្រារព្ធធ្វើឡើងយ៉ាងអធិកអធមកាលពីព្រឹកថ្ងៃសុក្រ ទី ០១ ខែកុម្ភៈ ឆ្នាំ ២០១៣ ដោយចាប់ផ្ដើមចេញដំណើរពីមុខព្រះបរមរាជវាំង ឆ្ពោះទៅវត្តភ្នំ រួចតម្រង់ឆ្ពោះទៅវិមានឯករាជ្យ រួចឆ្ពោះទៅកាន់វាលព្រះមេរុ ដោយចំណាយរយៈពេលប្រមាណជាង ៣ ម៉ោង និងមានការចូលរួមដង្ហែរពីសំណាក់សមាជិករាជវង្សានុវង្ស ថ្នាក់ដឹកនាំប្រទេស មន្ត្រីរាជការ កងកម្លាំងនគរបាលជាតិ ទាហាន កងរាជអាវុធហត្ថ ក្រុមយុវជនកាយឫទ្ធិ ក្រុមយុវជនកាកបាទក្រហមកម្ពុជា ព្រះសង្ឃ តាអាចារ្យ ដូនជី ជនជាតិដើមភាគតិច ជនជាតិអ៊ីស្លាម ចិន និងវៀតណាម។ល។ ដែលរស់នៅព្រះរាជាណាចក្រកម្ពុជា ប្រមាណ ៥០០០ នាក់ និងមានការចូលរួមពីមហាជននៅអមសងខាងផ្លូវរាប់សិបម៉ឺននាក់។

ពិធីដង្ហែរនេះត្រូវបានចែកចេញជា ១១ ផែន រួមមាន ៖

ផែនទី១. ជាផែន ជ័យបង្ហាញពីភាពរុងរឿង និងមោទនភាព ជាតិក្រោមបាវចនា “ជាតិ សាសនា ព្រះ មហាក្សត្រ”។

ផែនទី២. បង្ហាញពីសក្ដានុពល នៃអំណាចកម្លាំងទ័ពគ្រប់ប្រភេទនិងកម្លាំងយុវជន។

ផែនទី៣. អំពីអត្ថិភាព នៃព្រះរាជ ប្បវេណី និងព្រះរាជកេតនភណ្ឌ។

ផែនទី៤. បង្ហាញអំពីក្បួន មន្ដ្រីក្រសួងនានា។

ផែនទី៥. ភ្លេង និងសមាគមជនជាតិនានា។

ផែនទី៦. មន្ដ្រីរាជធានី-ខេត្ដ។

ផែនទី៧. ព្រះពុទ្ធសាសនា។

ផែនទី៨. ក្បួននាំមុខ ព្រះបរមសព។

ផែនទី៩. ព្រះទីនាំងបុស្បុកតម្កល់ ព្រះតម្កល់ ព្រះបរមសព។

ផែនទី១០. ក្បួនរបស់ព្រះរាជ វង្សានុវង្សក្សត្រី ប្រជាពលរដ្ឋ។

ផែនទី១១. ផែនរក្សាសន្ដិសុខ សុវត្ថិភាពកន្ទុយក្បូន។

មហាជនដែលនៅអមសងខាងផ្លូវក្នុងសម្លៀកបំពាក់កាន់ទុក្ខ បានអង្គុយបត់ជើង និងលត់ជង្គង់ សំពះប្រណំដោយទឹកមុខ និងទឹកចិត្តក្រៀមក្រំឥតគណនា ហើយអ្នកខ្លះយំសោកដោយក្ដីអាឡោះអាល័យចំពោះសម្ដេចព្រះមហាវិរក្សត្រ។

ដោយឡែក ព្រះរាជពិធីថ្វាយព្រះភ្លើងដល់ព្រះបរមសព នឹងប្រព្រឹត្តឡើងនៅថ្ងៃទី ០៤ ខែកុម្ភៈ ឆ្នាំ ២០១៣ ខាងមុខនេះ។

គួរបញ្ជាក់ថា សម្ដេចព្រះ នរោត្ដម សីហនុ ព្រះមហាវីរក្សត្រខ្មែរ បានយាងចូលទីវង្គតនាថ្ងៃទី ១៥ ខែតុលា ឆ្នាំ ២០១២ ក្នុងព្រះជន្មាយុ ៩០ ព្រះវស្សា។

ខាងក្រោម ជារួមភាពមួយចំនួនស្ដីអំពីព្រះរាជពិធីនេះ ៖